Подвиг за восхит: 11-годишниот Давид и 12-годишната Анастасија освоија три алпски врва над 4.000 метри

Младите Давид и Анастасија Цекови, на возраст од само 11 и 12 години, заедно со својот татко Иван Цеков, поминале еден месец на Алпите, каде што успешно освоиле неколку врвови повисоки од 4.000 метри и совладале една од технички сложените алпинистички насоки – Breithorn Traverse пишува „Фокус.мк“.

Меѓу нивните најголеми успеси се искачувањата на Roccia Nera (4.075 метри), Pollux (4.092 метри) и Castor (4.223 метри), како и целосното поминување на гребенската насока Breithorn Traverse, која завршува на западниот врв висок 4.164 метри.

На оваа авантура ѝ претходеле повеќемесечни подготовки. Таткото Иван претходно сам ја поминал планираната маршрута за да ги процени опасностите и техничките предизвици, а потоа со децата детално ги анализирал снимките и фотографиите.

Еден од најтешките предизвици било поминувањето на Breithorn Traverse, кое траело повеќе од 15 часа. Тројцата тргнале во четири часот наутро, а се вратиле околу 19:30 часот, совладувајќи тесни карпести и снежни гребени, стрмни премини и делови на кои морале да користат јаже.

Предизвици имале и по пристигнувањето на голема надморска височина, кога Давид и Анастасија почувствувале симптоми на можна висинска болест. Поради тоа, семејството го одложило искачувањето, побарало лекарски совет и продолжило дури откако децата целосно закрепнале.

Особено напорно било и искачувањето на Castor, каде што на одредени делови снежниот гребен бил толку тесен што имало простор едвај за едно стапало. И покрај сложените услови, младите алпинисти самостојно ги совладувале техничките делови, додека нивниот татко се грижел за осигурувањето со јаже.

Ова не е нивен прв голем планинарски подвиг. Во 2025 година, Давид и Анастасија успешно го искачиле и врвот Gran Paradiso, висок 4.061 метар.

Според досегашните проверки на семејството, ваква комбинација на сложени алпинистички искачувања досега не е документирана кај македонски планинари на нивна возраст.