Потпишан договор за соработка меѓу Државниот архив на Македонија и Хрватскиот државен архив

Државниот архив на Македонија и Хрватскиот државен архив потпишаа договор за соработка со кој се отвораат можности за реализација на заеднички проекти, размена на искуства и унапредување на архивската дејност.

Договорот во Загреб го потпишаа директорот на Државниот архив на Македонија, Димитар Богески, и директорот на Хрватскиот државен архив, Динко Чутура, во присуство на македонскиот амбасадор во Хрватска, Драган Ѓурчевски.

Како што соопшти Државниот архив, договорот предвидува соработка во организирање заеднички изложби, стручни работилници и предавања, како и размена на кадри и професионални искуства меѓу двете институции.

Посебен акцент е ставен на дигитализацијата на архивскиот материјал, неговата заштита, обработка, конзервација и реставрација.

Од Архивот посочуваат дека размената на искуства во делот на дигитализацијата е особено значајна за модернизација на архивската дејност и за подобрување на достапноста на историското и културното наследство за јавноста.

Воедно, од Државниот архив изразија благодарност до амбасадорот Ѓурчевски за поддршката и ангажманот во реализацијата на иницијативата.

Потпишувањето на договорот се оценува како дополнително зацврстување на соработката меѓу архивските институции на Македонија и Хрватска и како можност за развој на нови заеднички проекти во областа на архивистиката и културното наследство.

МИА