Преглед на вестите од светот

Американците масовно ја нападнаа Исламската држава во централна Сирија. Погодиле 70 локации со повеќе од 100 проектили. Ваквиот одговор на одмазда на САД доаѓа откако минатата недела тројца Американци беа убиени од сириските сили. 

„Наредив масовен напад врз терористите кои минатата недела ги убија нашите тројца големи патриоти — двајца војници и еден преведувач, сите извонредни луѓе. Операцијата беше многу успешна. Нападите беа прецизни. Секоја цел беше погодена беспрекорно. И воспоставуваме мир преку сила насекаде низ светот“, изјави Доналд Трамп, претседателот на САД.

Во видео објавено од Американската централна команда се наведува дека во нападите погодиле повеќе од 70 цели низ централна Сирија. Јорданските борбени авиони ја поддржале операцијата.

Коалиција предводена од САД, во последните месеци спроведува воздушни напади и копнени операции во Сирија, насочени кон осомничени припадници на Исламската држава, често со вклучување на сириските безбедносни сили.

Министерството за правда на САД го објави првиот сет долгоочекувани документи поврзани со осудениот сексуален престапник Џефри Епстин, по закон усвоен од Конгресот што наложува целосна транспарентност.

Дел од материјалите, кои вклучуваат фотографии, видеа и истражни извештаи, се цензурирани, а стотици илјади страници сè уште остануваат необјавени.

Во документите се појавуваат имиња на влијателни личности, меѓу кои поранешните американски претседатели Бил Клинтон и Доналд Трамп, како и други јавни фигури.

Министерството за правда нагласува дека појавувањето на имиња или фотографии не претставува доказ за вина, но објавата предизвика силни реакции во јавноста и политиката.

Политичкиот притисок нагло расте, а пратеници од двете партии ја обвинуваат администрацијата за прикривање и заштита на моќни поединци преку масовни редакции.

Министерството за правда призна дека нема да го испочитува крајниот рок за целосно објавување, тврдејќи дека приоритет е заштитата на жртвите.

Случајот Епстин повторно ја потресе американската јавност, ја отвори дебатата за институционална одговорност и ја продлабочи недовербата кон правосудниот систем, додека се очекуваат нови објави во наредните недели.

Џефри Епстин беше финансиски милионер и познат по своите високи врски со политички и јавни личности, но стана светски познат поради обвиненијата за сексуално злоставување на малолетни девојки и водење мрежа за трговија со луѓе за сексуални цели. Тој беше осуден и исто така се самоуби во затвор во 2019 година, додека го чекаше судењето.

Крвав петок во Тајван. Три лица загинаа, а пет се повредени во вчерашниот напад во централен Тајпеј. Напаѓачот започнал со испукување димни бомби на главната железничка станица, а потоа трчал кон блиската метро-станица, бодејќи со нож минувачи на патот за на крај и самиот да заврши фатално. Паднал од зграда додека го бркала полицијата.

Премиерот објави дека осомничениот имал претходни кривични досиеја и отворен налог за апсење.  Претрес бил извршен и во неговиот дом. Според тамошните медиуми,  носел заштитна опрема и маска. Поседувал и бомби.

Насилството во Тајван е многу ретко, а овој инцидент го потресе јавниот мир во главниот град.