Преглед на вестите од светот

Републиканците на американскиот претседател Доналд Трамп ја изгубија контролата и врз Претставничкиот дом и врз Сенатот, според проекциите на американските телевизиски мрежи, односно демократите ќе остварат победа на меѓуизборите во САД.

Тие ќе имаат мнозинство во Претставничкиот дом и Сенатот, што ќе значи значајна промена на рамнотежата на силите во Вашингтон.

Лидерот на демократите во Претставничкиот дом на Конгресот Хаким Џефрис изјави дека од денеска почнува големо американско враќање.

Акциите на компаниите поврзани со вештачката интелигенција беа под притисок ноќеска низ целиот свет, бидејќи демократите, се сметаат за застапници на мораториум за изградба на центри за податоци.

Американскиот претседател Доналд Трамп имаше пост на кој напиша „Не бев на гласачкото ливче, а да бев, ќе победевме.“

Претседателот на САД во вторникот за „Фајненшл тајмс“ изјави дека САД во моментов немаат непосредни планови за започнување воена акција против Иран.

Тој исто така нагласи дека доколку е потребно, САД се подготвени повторно да преземат воена акција.

Трамп изјави дека САД и Иран сè уште преговараат преку индиректни канали за тоа како да се справат со залихите збогатен ураниум на Иран.

Тој рече дека иако нуклеарните материјали на Иран остануваат закопани под стотици тони карпи, американската страна останува загрижена за нивното постоење и ова е едно од прашањата за кои двете страни продолжуваат да дискутираат.

Катар во вторник изјави дека САД и Иран ги разгледуваат предлозите насочени кон прекин на нивниот конфликт, но разликите меѓу двете страни остануваат нерешени и покрај континуираниот дипломатски ангажман.

„Премостувањето на јазот е сè уште во тек“.

Катар продолжува да ги пренесува предлозите меѓу страните во тесна координација со Пакистан, земјите од Советот за соработка во Заливот и други регионални и меѓународни партнери. Катарскиот претставник предупреди дека сè уште не може да се објави конкретен напредок, иако двете страни покажаа подготвеност да продолжат со дипломатијата.