Македонија
20. November 2026 - 16:37

Следната среда продолжение на надзорната расправа за Алта

Нови 22 сведоци ќе дадат исказ на продолжението на надзорната расправа за Алта банка, закажано за следната среда. Според листата, во собраниската клупа одговори треба да дадат членови на менаџерскиот тим и на Управниот одбор на Алта банка, ексградоначалничката на Скопје, Данела Арсовска, поранешниот гувернер Гошев, ексминистерката Нина Ангеловска, Миле Зечевиќ и експерти од областа на финансиите.

Од пратеничката група на СДСМ велат дека се подготвени за расправа и аргументи.

Левица, пак, не очекува дека надзорната расправа ќе донесе некакви резултати. Најавуваат активна дебата за, како што велат, да се дознае како финансискиот сектор дозволил влез на Алта банка во земјава.

Во пресрет на надзорната расправа, партиските штабови со нови обвинувања. СДСМ бара Обвинителството веднаш да постапи по кривичната пријава за гувернерот и да отвори истрага.

Од владејачката партија велат дека претходните обвинувања на СДСМ за сомнителни трансфери, одлив на пари и наводен ризик од пропаѓање на банката не се покажале како точни. Затоа, најавуваат законско решение со кое ќе се санкционираат лажни изјави или исправи што би ја загрозиле стабилноста на банкарскиот систем.

Во меѓувреме, Комерцијална банка е првиот конкретен заинтересиран купувач за преземање на Алта банка Битола. Надзорниот одбор донел одлука банката да учествува на претстојната јавна берзанска аукција за купување на доминантниот акционерски пакет.