Стасаа првите количини од лекот Трикафта

Лекот Трикафта конечно е донесен на Детската клиника. Од утре современата терапија за Цистична фиброза ќе ја добијат првите осум пациенти кои се во потешка здравствена состојба поради болеста, седум се возрасни над 18 години, а едно е дете.

-  Двајца од нив се во критична состојба и веќе се хоспитализирани на Клиниката за пулмологија, ефектот од терапијата тука е неизвесен, но ќе пробаме ако можеме да им ја подобриме белодробната функција, изјави проф. д-р Стојка Нацева Фуштиќ, директор на Клиниката за детски болести.

Станува збор за таблетарна терапија која пациентите со Цистична фиброза ќе ја добиваат еднаш месечно.

- Примаат две таблети сабалје од комбиниран модулатор и една таблета навечер од еден модулатор. Така да тоа е терапија која ќе си ја примаат дома и не се врзани со хоспитализација. Очекуваме секако позитивен ефект од терапијата во однос на подобрување на нивната белодробна функција и подобрување на квалитетот на животот, додаде проф. Фуштиќ.

Во првата група од парите 2,2 милиони евра кои ги обезбеди државата покрај овие осум, лекот ќе го добијат уште четири пациенти. Останатите ќе ги чекаат законските измени за да може државата да купува Трикафта директно од единствениот производител.

- Пациентите се во фокусот на нашата заложба како Министерство за здравство.и во соработка со Премиерот се бара решение и за останатите засегнати со оваа дијагноза, изјави Фатмир Меџити, министер за здравство.

На лекот Трикафта како спас за нивниот живот се надеваат околу 130 пациенти со цистична фиброза. Иако оваа терапија ја бараат скоро 3 години за жал требаше да почине нивен соборец за да Владата и останатите надлежни институции да ја убрзаат постапката за обезбедување на оваа модулаторна терапија.