Стојна не се откажува од наплатата за Куклица – се заканувала на посетители, па полицијата ја привела

Стојна Димитровска Бут не се откажува од наплатата за Куклица, повторно се најде во центарот на вниманието по инцидент кај познатиот туристички локалитет „Камени кукли“, познат како Куклица. Овојпат, обидот да наплати влезници на посетители завршил со полициска интервенција и нејзино приведување.

Според информациите од Министерството за внатрешни работи, 41-годишната кратовчанка била приведена вчера, на 27 октомври, во 11:30 часот, откако двајца посетители од Скопје пријавиле дека се обидела да им наплати билети за влез во локалитетот, а притоа им упатувала и закани.

Наместо мирно разгледување на една од најпознатите природни знаменитости во Македонија, посетителите се соочиле со непријатна ситуација, која завршила со пријава во полиција.

Полициски службеници од ОВР Кратово постапиле по пријавата и ја лишиле од слобода.

Од МВР информираат дека по целосно документирање на случајот, против неа ќе биде поднесена соодветна пријава.