Трамп: Маск направи фантастична работа додека беше шеф на Одделот за владина ефикасност

Американскиот претседател Доналд Трамп денеска се збогува со Илон Маск кој ја напушта својата позиција како раководител на Одделот за владина ефикасност, или DOGE, и ќе се префокусира на водењето на своите компании, вклучувајќи го производителот на електрични возила Tesla, компанијата SpaceX и платформата за социјални медиуми X.

Трамп рече дека Маск направил „колосални промени во стариот начин на работење во Вашингтон“ и рече дека дел од персоналот на Маск во Одделот за владина ефикасност ќе останат на своите места.

Маск, облечен во црно и носејќи маица на која пишува „The Dogefather“, кима[e со главата додека американскиот претседател ги наведуваше договорите што се откажани под водство на Маск.

„Мислам дека тимот на DOGE работи неверојатна работа и ќе продолжи да работи неверојатна работа“, рече Маск .

Маск остави длабок белег врз федералната бирократија, вклучувајќи илјадници вработени кои беа отпуштени или принудени да си заминат. Некои владини агенции практично исчезнаа, како што е Агенцијата на СAД (УСАИД), која им обезбедуваше помош на сиромашните луѓе низ целиот свет. Истражувачите на Универзитетот во Бостон проценуваат дека стотици илјади луѓе веќе починале како резултат на намалувањата на средствата од УСАИД.

И покрај нарушувањата што произлегоа од тоа, Маск беше далеку од исполнување на своите цели. Откако вети дека ќе ги намали федералните трошоци за 1.000 милијарди долари или дури 2.000 милијарди долари, тој ги намали очекувањата на само 150 милијарди долари оваа фискална година.

Не е јасно дали таа цел е исполнета. На веб-страницата на DOGE се проценува дека заштедил 175 милијарди долари, но информациите се полни со грешки и разубавувања, јавија американски медиуми.

Трамп рече дека Маск го предводел „најсеопфатниот и највлијателен напор за владина реформа во последните генерации“. Тој, исто така, навести дека Маск „навистина не си заминува“ и дека ќе се враќа повремено за да следи што се случува со администрацијата.

Маск, кој е најбогатиот човек во светот, неодамна изјави дека ќе ги намали своите политички донации. Тој беше главен донатор на Трамп во минатогодишната претседателска кампања.

„Ова ќе биде неговиот последен ден, но не баш, бидејќи тој секогаш ќе биде со нас и ќе ни помага во текот на целиот пат. Илон е одличен“, напиша Трамп на социјалните мрежи синоќа.

Позицијата на Маск како специјален владин службеник беше замислена да биде привремена.