Внукот на Али Ахмети уапсен со арсенал петарди, обвинителството не открива како ќе го казни

Обвинителство се мисли за што да го гони внукот на Ахмети кој синоќа беше уапсен со полн гекеп петарди. Полицијата избројала дека Дрин Ахмети во својот џип со албански регистрации нелегално превезувал вкупно 749 пиротехнички средства.

На фотографијата споделена од МВР се гледа силниот новогодишен арсенал, моќни петарди, огномети - сите сокриени во црни вреќи. Денеска од полицијата велат дека ја завршиле својата работа со внукот на лидерот на ДУИ, кој синоќа неколку часа беше во полициската станица Беко. Сега, надлежноста е кај обвинителството.

„СВР Скопје во координација со Јавен обвинител поднесе соодветен поднесок до ОЈО Скопје за нивно понатамошно постапување“, велат од МВР. 

Засега обвинителството не открива како ќе го казни Ахмети. Првин ќе се вештачеле стотиците петарди и огномети, па од таа анализа ќе зависело за што ќе се гони 25 годишниот внук на Ахмети.

„За настанот е известен Јавен обвинител. Во зависност од фактите кои ќе бидат утврдени со вештачења на пронајдените пиротехнички средства, јавниот обвинител ќе одлучува за натамошниот тек на постапката“, информира обвинителството.

Последните измени на кривичниот законик предвидуваат поблаги казни за поседување петарди и огномети. Нивниот превоз, се казнува со најмногу три години затвор, или парична казна.   

„Ако предмет на делото е поголемо количество на распрскувачки материи наменети за дозволени забавни, свeчени и други активности, сторителот ќе се казни со парична казна или со затвор до три години“, пишува во законот. 

Но, уште пред огнометите со кои внукот на Ахмети сакал ноќва да го осветли небото, тој блесна на бизнис сцената. За јавноста стана познат откако стана сопственик на зградата Соравиа во центарот на Скопје, за која не плати ниту денар. За својот успех се пофали и пред новинарите, а за својот чичко, Али Ахмети, рече дека му бил мотивација за животот.