Во чест на Св. Трифун групна изложба од 35 уметници во Музеј Галерија Кавадарци

На 13.02 ќе се реализира групна изложба на 35 уметници по повод празникот Св. Трифун, претставувајќи репрезентативен пресек на современи ликовни изрази и авторски сензибилитети. Иако иницирана од празничниот контекст, поставката не е тематски дефинирана, туку функционира како отворена платформа за слободен уметнички израз.

Оваа година, изложбата се реализира по трет пат во овој формат, со што се заокружува една кратка, но значајна историја на континуитет и посветеност кон одбележувањето на празникот Св. Трифун преку уметноста. Низ овие три изданија, „Боите на Св. Трифун“ постепено се етаблира како препознатлива традиција во културниот живот на Кавадарци и пошироко.

Секој уметник учествува со дело по сопствен избор, афирмирајќи ја својата уникатна поетика, автономен визуелен јазик и индивидуален творечки пристап. Токму таа слобода на избор овозможува изложбата да се развие како простор на различности, каде индивидуалните авторски позиции  коегзистираат во заедничка  галериска целина.

Во изложените дела се забележува изразита ликовна разноликост. Дел од авторите се задржуваат на фигуративниот израз, третирајќи ја човечката форма, телесноста и внатрешната психолошка состојба со нагласена експресивност.

Други пристапуваат асоцијативно и симболички, преку органски структури, архетипски и животински мотиви, отворајќи слоевити значења поврзани со животниот импулс и енергијата на постоењето .Паралелно, присутна е и силна апстрактна линија – гестуална, колористички интензивна и ритмички динамична, во која бојата и потегот функционираат како примарни носители на емоција и движење.

Геометризираните композиции внесуваат чувство на ред, јасна организација и визуелна стабилност, воспоставувајќи рамнотежа во однос на експресивниот израз.

Изложбата воспоставува ненаметлив дијалог со празникот Св. Трифун – како момент на средба, заедништво и обновување. Традицијата овде не е директно интерпретирана, туку постои како културен контекст што ја обединува различноста без дa ја ограничува индивидуалноста.

Така, изложбата се заокружува како достоинствен визуелен настан, во кој слободата на авторскиот избор и богатството на различни поетики се издигнуваат во заедничко сведоштво за виталноста и континуитетот на современата уметност.

Музеј Галерија Кавадарци упатува искрен поздрав и благодарност до сите учесници — ликовни уметници кои со своето творештво ја збогатуваат оваа изложба. Посебна благодарност се упатува за нивниот несебичен придонес, со тоа што секој автор остава по едно свое дело во збирката на Музеј Галерија Кавадарци, со што трајно се збогатува музејскиот фонд и се создава вредно културно наследство за идните генерации.

Нека „Боите на Св. Трифун“ продолжат да се развиваат и да сведочат дека уметноста, втемелена во традицијата, претставува жив и траен израз на културниот идентитет.