Земале брзи кредити со туѓи податоци и направиле штета од над 12 милиони - Кривична за две кумановки и петмина банкари

Седум лица се опфатени со кривична пријава за измами со брзи потрошувачки кредити во Куманово, со кои, според полицијата, била остварена противправна имотна корист од над 12,2 милиони денари.

Според информациите од СВР Куманово, две жени на возраст од 23 и 35 години се сомничат за измама и злоупотреба на лични податоци. Во периодот од јануари до јули 2026 година, помладата од нив, наводно, во 18 наврати користела лични податоци на други лица за да аплицира за брзи кредити без нивна согласност.

По одобрувањето и исплатата на кредитите, парите биле противправно присвоени од двете осомничени, наведува полицијата.

Во случајот се опфатени и пет лица на возраст од 27 до 48 години, вработени како банкарски службеници во филијала на една банка. Тие се сомничат дека со злоупотреба на службената положба и овластување овозможиле спроведување на измамата и располагање со одобрените средства.

На тој начин, според пријавата, на двете жени им била овозможена противправна имотна корист во вкупен износ од 12.221.500 денари.