20-тина повредени по силното невреме во Скопје, надлежните ги санираат штетите

20-тина лица се здобија со полесни и потешки повреди по силното невреме кое попладневно го зафати Скопје.

Според последните информации на Ургентниот Центар во Скопје лекарска помош побарале 9 лица од кои едно лице со потешка повреда на главата и двајца со скршеници, додека 6 лица биле донесени и во старата Градска болница со полесни повреди, набиенци и посекотини и едно лице кое е задржано на опсервација поради повреди на карлица.

Невремето проследено со силен ветер открона голем број дрвја, кровни конструкции од згради и куќи и оштети електрични кабли и автомобили.

Од ЦУК информираат дека над 1000 граѓани пријавиле штети на број за итни повици 112, а состјбата на терен се уште се утврдува.

Штетите кои ги предизвика невремето го активираше и кризниот штаб на Град Скопје, градоначалникот Ѓорѓиевски информираше дека на терен се сите надлежни институции, во постојана координација со Центарот за управување со кризи, МВР, ЕВН и противпожарната бригада на Град Скопје.

Кризните штабови ги активираа и Општините Центар, Карпош, Гази Баба, Бутел, Аеродром и Ѓорче Петров, надлежните најавуваат дека на терен ќе бидат во текот на целата вечер за санирање на штетите и апелираат граѓаните да бидат особено внимателни бидејќи се уште постои ризик да бидат повредени особено од кронви конструкции кои висат од зградите.