Четиригодишно девојче почина од глад во Газа додека Израел го ограничува снабдувањето со храна

Четиригодишната Разан Абу Захер вчера ја загуби битката за живот.

Таа почина во болница во централна Газа од компликации предизвикани од глад и неухранетост, според медицински извор. Нејзиното скелетно тело беше положено на камена плоча.

Најмалку 76 деца во Газа починале од неухранетост од почетокот на конфликтот во октомври 2023 година, како и десет возрасни, соопшти палестинското министерство за здравство. Според Светската здравствена организација, повеќето од овие случаи се случиле откако израелските власти воведоа блокада на почетокот на март.

Разан беше едно од најмалку четири деца што починаа во последните три дена, од кои најмалото имаше само три месеци. Во изминатите 24 часа, регистрирани се 18 смртни случаи поради глад во Газа, соопшти министерството за здравство, што укажува на продлабочување на кризата во оваа област.

Си-Ен-Ен првпат се сретна со Разан пред еден месец. Таа веќе беше ослабена од глад и крајно исцрпена. Нејзината мајка, Тахрир Абу Дахер, тогаш рече дека нема пари да купи млеко, кое во секој случај ретко беше достапно.„Нејзиното здравје беше многу добро пред војната, но по војната, нејзината состојба почна да се влошува поради неухранетост. Нема ништо што би ја зајакнало“. Тоа беше на 23 јуни. Разан веќе беше во болница 12 дена. Таа се бореше за живот уште 27 дена.

Разан почина сред зголемениот глад во Газа, при што протокот на хуманитарна помош е значително намален од почетокот на март, кога израелските власти забранија влез на конвои во Газа. Оваа забрана беше делумно укината кон крајот на мај, но агенциите за помош велат дека количините што стигнуваат до територијата се далеку од доволни за да ја одржат популацијата.

Израел соопшти дека го запира снабдувањето со помош во Газа бидејќи Хамас крадел и профитирал од неа - обвинување што Хамас го негира. Израелските агенции исто така велат дека Обединетите нации не ја подигнале помошта подготвена за транспорт во Газа. ООН, од друга страна, соопшти дека израелските сили често одбиваат дозвола за движење на помошта во Газа и дека многу повеќе чека да биде пуштена.

Израелската агенција што го управува протокот на помош во Појасот Газа, Координатор за владини активности на териториите (COGAT), во изјава рече дека израелските одбранбени сили „работат на овозможување и олеснување на трансферот“ на хуманитарна помош, вклучително и храна. „Од почетокот на непријателствата до денес, приближно 67.000 камиони со храна влегоа во Појасот Газа, доставувајќи околу 1,5 милиони тони храна“, соопшти COGAT. „Израел ќе продолжи да го олеснува влезот на храна“ во Газа, рече COGAT, „преземајќи ги сите можни мерки за да спречи терористичката организација Хамас да ја присвои помошта.

„Газа беше силно зависна од хуманитарна помош и комерцијални пратки со храна пред почетокот на конфликтот во октомври 2023 година, а недостигот од храна, медицински материјали, гориво и други потреби само се влоши оттогаш. Недостигот од храна од март доведе до брзо зголемување на бројот на луѓе што се упатуваат кон веќе преоптоварените болници. „Газа е сведок на најлошата фаза на глад, кој достигна катастрофални нивоа среде невидено меѓународно молчење“, рече д-р Халил Ал-Дакран, портпарол на болницата Ал-Акса Мартирс, каде што почина Разан.

Ал-Дакран рече дека доенчињата што сега умираат се ограбени од своето детство двапати, „еднаш со бомбардирање и убивање, и повторно со лишување од млеко и парче леб“.

Министерството за здравство во саботата соопшти дека „невиден број изгладнети граѓани од сите возрасти пристигнуваат во одделите за итни случаи во тешки состојби на исцрпеност и замор“. „Стотици чии тела се сериозно ослабени сега се изложени на ризик од скорешна смрт поради глад и неможноста на нивните тела да издржат повеќе“, додаде министерството.

Палестинскиот центар за човекови права – невладина организација што работи во Газа – вчера објави дека еден од нивните тимови во Газа рекол: „Нашите лица се променија и нашите тела се исушија. Веќе не се препознаваме од екстремна исцрпеност, како полека да исчезнуваме и умираме“.

Д-р Сухаиб Ал-Хамс, директор на теренската болница Кувајт во Хан Јунис, за Си-Ен-Ен изјави дека луѓето што пристигнуваат таму се во „огромна потреба од храна пред лекови, бидејќи нивните тела достигнале точка над издржливоста и сите се изложени на ризик од смрт“.

„Денес, Светската централна кујна престана да испраќа оброци за медицинскиот персонал, тие ни испраќаа само ориз. Лекарите работат 24 часа на ден без храна, ниту дома, ниту во болница. Луѓето умираат од глад“, рече Ал-Хамс.

Светската централна кујна потврди дека нивните тимови во Газа останале без состојки за готвење топли оброци. „Вчера [сабота] послуживме 80.000 оброци, исцрпувајќи ги последните од нашите обновени залихи додека камионите со помош остануваат заглавени на границата. „Ова е вторпат недостигот на пристап до помош да ги принуди нашите кујнски операции да паузираат“, додаде таа.

Во својот очај, илјадници луѓе секој ден го ризикуваат животот за да најдат нешто за јадење. Повеќе од 70 луѓе се пријавени како убиени вчера во северна Газа додека очајно барале хуманитарна помош со храна, според министерството за здравство, кое рече дека биле застрелани од израелски војници.

Израелските одбранбени сили велат дека војниците во областа „Испукаа предупредувачки истрели за да отстранат непосредна закана за нив. ИДФ е свесна за тврдењето за жртви во областа, а деталите за инцидентот сè уште се испитуваат.“ „Првичниот преглед сугерира дека бројот на пријавени жртви не е во согласност со информациите што ги поседува ИДФ“, додаде таа.

Д-р Мохамед Абу Салмија, директор на болницата Ал-Шифа, каде што беа однесени многу од жртвите, рече дека „значителен број цивили, па дури и медицински персонал, пристигнуваат во состојба на онесвестување или колапс поради тешка неухранетост.

Речиси 800 Палестинци биле убиени додека се обидувале да пристапат до помош во Газа помеѓу крајот на мај и 7 јули, според Канцеларијата на Високиот комесар за човекови права на ООН (OHCHR). Во тој период, OHCHR регистрираше убиства на 798 лица, од кои 615 биле убиени во близина на местата на контроверзната хуманитарна фондација во Газа поддржана од САД (GHF). Додава дека 183 други биле убиени „на патеките на конвоите со помош“ без да даде детали за тоа кој ги водел тие конвои. Десетици други биле убиени оттогаш, според министерството за здравство, вклучително и повеќе од 30 во јужна Газа во саботата.

Том Флечер, координатор за итна помош на ООН, во четвртокот изјави пред Советот за безбедност на ООН дека храната во Газа се исцрпува. „Оние што ја бараат ризикуваат да бидат застрелани. Луѓето умираат обидувајќи се да ги нахранат своите семејства“. Тој рече дека стапките на глад кај децата достигнале највисоки нивоа во јуни, со повеќе од 5.800 девојчиња и момчиња дијагностицирани со акутна неухранетост.

Канцеларијата на ООН за координација на хуманитарни прашања во петокот соопшти дека добива „длабоко вознемирувачки извештаи за неухранети деца и возрасни што се примаат во болници со малку достапни ресурси за правилно лекување“. Во саботата, Сармад Тамими, пластичен хирург волонтер во Медицинска помош за Палестинците, за Си-Ен-Ен изјави: „Искрено, мислам дека среќните се оние што се убиени веднаш поради ужасните хорори што ќе ги доживеат со нивните тешки повреди, со несоодветна исхрана, несоодветни медицински материјали, инфекции, црви и болнички инфекции“.

МИА