Деветнаесетти Петровденски планинарски марш

Планинарско-спортскиот клуб „Осогово“ од Кочани денеска го организира 19. традиционален Петровденски планинарски марш на релација Пониква – Раткова Скала.

Маршот, што секоја година собира голем број планинари, рекреативци и љубители на природата од Македонија и странство, започна во 7:00 часот од местото викано  „Аеродром“ на Пониква.

Патеката е долга шест километри во еден правец, а пешачењето трае приближно три часа. Организаторите информираат дека трасата е целосно маркирана, има повеќе места со питка вода и е со средно лесна тежина, што овозможува учество на сите љубители на планината.

За сите учесници ПСК „Осогово“ обезбедува традиционален планинарски ручек – планинарско гравче, кое ќе биде послужено во манастирската трпезарија. Организаторите апелираат секој учесник да понесе сопствен прибор за јадење. 

МИА