Ѓорѓиевски: Заедно со Кризниот штаб и екипите на јавните претпријатија сме на терен

Поради силното невреме што пред малку го зафати Скопје, Кризниот штаб на Град Скопје, заедно со сите надлежни служби и јавни претпријатија, е целосно мобилизиран и подготвен за брза и навремена интервенција, информира грдоначалникот на Скопје, Орце Ѓорѓиевски.

Тој во Фејсбук обкава нагласи дека се во постојана координација со ЦУК, МВР, ЕВН, Противпожарната бригада на Град Скопје и со сите надлежни институции.

-Сите расположливи капацитети се ставени во функција, за заштита на граѓаните и спречување поголеми штети и последици - додаде тој.

Екипите на Град Скопје, истакна Ѓорѓиевски, ќе останат на терен и во текот на целата ноќ и ќе интервенираат на секоја локација каде што ќе има потреба.

-Сите граѓани на кои им е потребна помош или друга итна состојба, можат да се јават на телефонскиот број: +389 78 207 687. Апелирам до сите граѓани да бидат внимателни и смирени, да ги следат препораките на надлежните институции и да соработуваат со службите на терен. Службите се мобилизирани. Екипите се на терен. Граѓаните не се сами- додаде Ѓорѓиевски.