Иран за првпат потврди: За време на сузбивањето на антирежимските протести апсени и деца

Иранските власти за првпат потврдија дека меѓу уапсените за време на антирежимските протести имало и деца, соопшти заменик-претседателот на парламентарната комисија за образование, Фаршад Ебрахимпур.

Бројот на уапсени деца помлади од 18 години не е прецизиран, ниту пак е познато колку од нив ќе останат во притвор, јави „Њујорк тајмс“.

Независните групи за човекови права проценуваат дека за време на протестите биле приведени најмалку 300 деца, адолесценти и ученици.

Синдикатот на иранските наставници ги осуди апсењата и насилството врз децата и повика на итно ослободување на притворените ученици. Некои случаи вклучуваат тинејџери кои биле тепани и застрелани на улиците, според изјавите на сведоците.

Протестите почнаа во декември поради економските проблеми, но набрзо прераснаа во пошироко антирежимско движење. Властите во последно време ги засилија апсењата и безбедносното присуство во училиштата. Иранската влада го исклучи интернетот и ја ограничи комуникацијата, отежнувајќи го утврдувањето на точниот број на жртви.

Последниот официјален податок на Советот за национална безбедност наведува 3.117 загинати, додека американската агенција „Human Rights Activist News Agency“ соопшти за најмалку 6.479 смртни случаи, вклучувајќи 118 деца.