Кина постави обемен ВИ-модел на Кинеската вселенска станица

Кина првпат инсталираше и употреби обемен и професионален модел на вештачка интелигенција на Кинеската вселенска станица, каде што ВИ треба да помага во подготовката за активностите на астронаутите и обезбеди информирана и специјализирана поддршка за нивната работа во Земјината Орбита.

ВИ-системот, познат како „Вуконг вештачка интелигенција“, е лансиран во орбитата со товарното вселенско летало „Тијанџоу-9“. Развиен врз основа на домашни модели со отворен код, тој ги интегрира барањата на мисиите со човечки екипаж во вселенските летала и комбинира претходна обука со фино подесување на инструкциите за да се изгради ВИ-модел во голем обем, специфичен за доменот и база на знаење насочена кон стандардите за вселенски летови. Зоу Пенгфеј од Кинескиот центар за истражување и обука на астронаути изјави за државната „ЦЦТВ“ дека астронаутите можат „да го прашаат ’Вуконг’“ за задачите на дневна основа…

– А, за време на нивната работа, можат да побараат и насоки или знаење во вид на објаснување. Улогата на системот е да им обезбеди на астронаутите директни, прилагодени информации по потреба, објасни Пенгфеј.

Моделот е дел од интелигентен систем за поддршка со прашања и одговори, при што еден сегмент работи на Земјата, а друг – во орбитата. Заедно, тие обезбедуваат длабинска анализа на стручно знаење и сѐ тоа помага во решавањето на предизвикувачки проблеми во реално време.

Моделот е наменет да се справи со сложеноста, разновидноста и огромните барања за податоци на вселенските мисии со екипаж, се вели во известувањето. Користи и обработка на податоци заснована на сите претпоставени можни случаи, за да се обезбедат брзи, точни и јасни одговори.  

МИА