Македонскиот народен театар одбележува 81 година

Македонскиот народен театар денеска одбележува 81 година од првата претстава на македонски јазик, со која почнува континуираната работа на ансамблот на театарот. 

„Сонцето, колку е блиску сонцето“ е првата реченица на македонски јазик што ја изговорила актерката Вера Вучкова на 3 април 1945 на изведбата на претставата „Платон Кречет“ од советскиот драматург Александар Корнејчук, во режија на Димитар Ќостаров, во превод на Блаже Конески.

МНТ лани го одбележа 80-годишниот јубилеј со сценско-музички проект во режија на Дејан Пројковски, со наслов  „Сонцето, колку е блиску сонцето - Made in МNT“, кој реферира на првата изговорена реплика на македонски јазик.  

Претставата за осум децении постоење беше осмислена како аудиовизуелно патување низ македонската драматургија, поезија, проза и ликовна уметност, односно, како што изјави режисерот: „емотивна приказна посветена на големите актери, режисери, драматурзи и на сите професионалци зад кулисите задолжени за создавањето на сценскиот универзум во МНТ“.

Осумдесет и првиот роденден МНТ го одбележува со гостувања на театри од регионот: „Амадеус“ во режија на Александар Поповски, во изведба на Словенечко народно гледалишче (СНГ) од Марибор, монодрамата „Безгрешна“ (Immaculata), инспирирана од романот „Марииниот завет“, која е омаж за словенечкиот театарски режисер Томаж Пандур (1963 - 2016) и се реализира во продукција на СНГ Марибор и претставата на Црногорско народно позориште „Другата страна“, во режија на Борис Лиешевиќ.

МИА