Маркетите менуваат цени, Владата најавува ревидирање на одлуката но само за десетина производи

Нови, повисоки цени добија прехранбените производи кои Владата ги смета за луксуз. Не се илјада, вели вицепремиерот Битиќи – станува збор за над 350 категории. А листата производи чие ДДВ се зголемува за 5% е долга. Маркетите веќе ја добиле и од утринава лепат нови цени. Велат дека ќе им требаат неколку дена за да ги корегираат на сите артикли.

Зденки, млечни и сирни намази, се продаваат по повисока цена од 2 до 9 денари, поскапеа и сите видови зачини, мајонезот, сенфот, конзервираната храна, сите компоти, сите видови еурокреми, пудинзи, рибите,  со исклучок на пастрмката, пангата и осличот, овесните снегулки, сладоледи, сите бонбони, апетисаните, чипсот, мастиките за џвакање. Зголемено ДДВ од 5 на 10% има и кај дел од зимнацата, односно лутеницата, фефероните, тиквиците, модриот патлиџан.  Битиќи смета дека листата е коректна, некои производи биле лукузуз, а некои не биле здрави.

- Во одредени земји, сладолед, чипс и мастики, спаѓаат во нездрави производи затоа што имаат повисока шеќерна вредност и тоа не е здраво за населението, па затоа имаат трипати повисоки даночни стапки. Ние тоа не го правиме, но не сметаме дека овие производи спаѓаат во основни прехранбени производи – рече вицепремиерот Фатмир Битиќи. 

Експертите пак велат - листата е долга и збунувачка. Се користат тарифни броеви кои ретко кој ги знае. Содржи многу производи кои секојдневно се користат и зголемувањето на нивните цени серизоно ќе се одрази врз стандардот кај граѓаните. Очекуваат да се ревидира. 

Да се ревидира листата побара и ВМРО-ДПМНЕ. За сите производи кои се за широка потрошувачка, бараат да се врати данокот од 5 отсто. 

Вицепремерот пак вели – можно е ревидирање, но само на 10-тина производи од листата на следната владина седница во вторник. 

Инаку со зголемување на ДДВ од 5 на 10% власта очекува да собере дополнителни 70 милиони евра во буџетот.