Нов бран на Ковид 19 - колку е опасен?

Нов Корона бран го зафати целиот регион. Во Грција дневно регистрираат над 20.000 заразени, по над 1000 случаи за 24 часа бележат и во Србија и Албанија. И кај нас последните денови има зголемен број односно по 300 позитивни во дневните извештаи на ИЈЗ.

Од Комисијата за заразни болести велат дека високи бројки на заразени се очекуваа на есен кога ќе залади, но не и сега. Ова најверојатно се должи на новите варијанти на Омикрон кои според научниците за разлика од првичните варијанти и до 4 пати ги одбегнуваат антителата од вакцините, но и од претходните инфекции.

- За разлика од првите варијанти БА1 и БА 2 кои се задржуваа на горниот респираторен тракт, новите БА 4 и БА 5 варијати според истражувањето на универзитетот во Токио можат да предизвикаат и бронхопневмонии, изјави д-р Злате Мехмедовиќ, портпарол на Комисијата за заразни болести.

Според матични лекари најголемиот дел од заразените периодов биле или на летување или на прошетки надвор од државата. Епидемиолозите апелираат граѓаните да бидат внимателни посебнои ако престојуваат во затворени простории.

- И доколку се возат во такси превоз надвор може да стават маска, вели д-р Сашко Олумчев, епидемиолог.

Од друга страна иако има пораст на бројот на новозаразени, нема наплив на пациенти во болниците. Токму затоа засега Комисијата не планира враќање на Ковид мерките.