Ниту збор во Судски совет за пораката на холандскиот амбасадор

Се врати Дамева, а во Судски дојде и претседателката на Врховен. Телото кое ги следи состојбите во правосудството, ја одржа првата седница со старо-новата претседателка. Иако имаше најостра критика кога ја разрешија, Дамева не сакаше да ја коментира пораката на холандскиот амбасадор според кој, слабее владеењето на правото во земјава. Јан Коп не го спомнаа ниту останатите членови.. Најголем интерес покажаа за судијката Софија Спасова Медарска која бара мирување на судиското место во граѓанскиот суд бидејќи е избрана за член на антикорупциската комисија. Судски го одби предлогот – не бил предвиден со законот за судови, а Медарска била именувана за друга јавна функција.

Соочена со разрешување заради недоаѓање на седниците, во Судски седна и претседателката на Врховниот суд. Иако без право на глас, Адеми имаше свои препораки и совети по точките од дневниот ред.

Откако минатата недела се соочи со аргументите за разрешување, Адеми сега го чека извештајот од комисијата за кој ќе се дебатира во Советот. Политичките притисоци за кои таа говореше, ги осуди и холандскиот амбасадор, нарекувајќи ги неприфатливи.