ОЈО отвори истрага против 21-годишен скопјанец, во претрес на таванска просторија во зградата каде живеел пронајдена дрога и оружје

Јавен обвинител од Основното јавно обвинителство Скопје отвори истражна постапка против 21-годишен скопјанец, откако во претрес на таванската просторија во зградата каде живее осомничениот во Аеродром била пронајдена дрога и оружје.

Лицето, како што информираат од ЈОРСМ, е осомничено дека извршило кривични дела „Неовластено изработување, држење, посредување и тргување со оружје или експлозивни материи“ од член 396 и „Неовластено производство и пуштање во промет наркотични дроги, психотропни супстанции и прекурсори“ од член 215 од Кривичниот законик.

- Полициски службеници вчера извршиле претрес на таванската просторија во зградата каде живее осомничениот во Аеродром и утврдиле дека таму без дозвола држел огнено оружје – пиштол со калибар 7,65 мм и пет куршуми. Исто така, била пронајдена и опојна дрога – 4,2 килограми марихуана и 5,98 грама кокаин, се вели во соопштението од Обвинителство.

Во конкретниот случај постојат околности кои укажуваат дека 21-годишниот осомничен би можел да се даде во бегство, дека ќе ги прикрива трагите на кривичното дело или ќе влијае врз сведоци, но и особени околности што го оправдуваат стравот дека ќе го повтори кривичното дело. Од тие причини јавниот обвинител до судијата на претходна постапка достави предлог за определување мерка притвор.