Околу половина час се чека за излез од државата на премините „Дојран“ и „Табановце“, ГП Евзони блокиран за сообраќај

Сообраќајот на државните патишта вечерва се одвива непречено, по наместа влажни коловози. Интензитетот на сообраќај на патните правци надвор од градските средини е умерен, соопшти Автомотосојузот на Македонија. 

Граничниот премин Евзони (ГП Богородица) вечерва е повторно блокиран за сите видови возила поради штрајк на грчките земјоделци. 

Како што информира АМСМ, на граничниот премин „Дојран“ за излез од државата се чека 30 минути.  На граничниот премин „Табановце”, пак, времето на чекање за излез од државата е 40 минути. На останатите гранични премини од македонска страна нема подолги задржувања за влез и излез од државата.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите каде што има можност од појава на одрони.

-Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево, соопшти АМСМ. 

МИА