Опозицијата бара поевтино гориво

Опозицијата бара Владата да ја намали цената на горивата по поевтинувањето на суровата нафта на светските берзи. 

„Зошто се поскапени цените кога има пад на светските берзи?

Со сегашното зголемување граѓаните плаќаат над 3 милиони евра неделно повеќе. Се поставува прашањето кој има интерес од ова поскапување и каде завршуваат овие пари? Дали Владата намерно ги зголеми цените иако цената на барелот веќе падна вчера?“

Исто барање утрово дојде и од ДУИ, а партијата има и други предлози.

„Имајќи ги предвид изјавите на надлежните институции дека државата располага со резерви на нафта за околу 62 дена, овие резерви треба веднаш да се пуштат во промет со максимална цена од 71 денар по литар. Треба да се нагласи дека овие количини се набавени по уште пониски цени.

Владата треба веднаш да ја разгледа можноста за намалување на фискалните давачки за нафтените деривати, вклучително и акцизите и другите давачки, со цел стабилизирање на цените и заштита на стандардот на граѓаните.“

Регулаторна вчера ја зголеми максималната цена на дизелот за 14,5 денари а бензинот стана поскап за 5 денари по литар. Нова редовна корекција на цената се очекува идниот понеделник.