Почина оперската примадона Милка Ефтимова

Оперската примадона и доајен на Македонската опера и амбасадор на македонската уметност и култура во светот Милка Ефтимова почина утрово во Скопје на 89 години.

Во својата долготрајна, богата и плодна кариера, таа отпеа четириесет оперски улоги, како и многубројни партии во ораторијални дела и соло изведби, застанувајќи повеќе од 1.200 пати на оперската и концертната сцена, во дваесетина земји низ светот.

Со извонредна музикалност и изразито чувство за артизам, таа ги креираше Орфеј во „Орфеј и Евридика", Ацучена во „Трубадур", Еболи во „Дон Карлос", Сузуки во „Мадам Батерфлај", Марфа во „Хованшчина", Урлика во „Бал под маски" и многу други, а најголем печат остави во насловната улога на „Кармен". Од оперската сцена јубилејно се прости токму со Кармен на 6 ноември 1991 година.

Милка Ефтимова беше редовен професор на Факултетот за музичка уметност во Скопје, наставник на Музичко-балетскиот училиштен центар во Скопје и Средното музичко училиште во Штип. Во нејзината богата оперска кариера одликувана е со наградите: „11 Октомври“ (1985), „Св.Климент Охридски“ (2001), „Мајка Тереза“ (2009), како и Орден за заслуги на Република Северна Македонија (2022).