Расте интересот за згрижувачки семејства во Струмица

Бројот на згрижувачки семејства на Југоистокот од државата се зголемува. Позитивен пример за тоа е Струмица каде со години немаше ниту едно такво семејство, а сега бројката изнесува 17. Дополнително  уште пет ја поминале потребна обука и веќе се подготвени за прием на деца. Министерката за труд и социјална политика Јована Тренчевска вели дека голем придонес за ова има и кампањата која дала резултати на територијата на цела држава.

За да ги доближи сите неопходни информации до граѓаните, но и да им ја олесни постапката на потенцијалните згрижувачи министерството од неодамна креираше и посебна веб платформа специјално за таа намена. Очекувањата се дека истата дополнително ќе придонесе за подигање на свеста кај граѓаните околу важноста на згрижувачките  семејства.

Од министерството најавуваат дека кампањата ќе продолжи и во иднина со цел секое дете кое ќе има потреба од тоа да му се обезбеди сместување во згрижувачко семејство, а не во институција. Во моментов во државата постојат три центри кои им нудат 24 часовна поддршка на сите семејства кои имаат згрижено деца.