Тела на пет бебиња пронајдени во картонски кутии во семејна куќа на југот на Франција

Телата на пет новороденчиња биле пронајдени денеска во семејниот дом на брачен пар во Оранж, на југот на Франција.

Според информации од извор близок до истрагата, полицијата ги открила остатоците од бебињата во картонски кутии. Откритието се случило само еден ден откако мајката вчера родила здраво дете, пишува Ле Паризиен (Le Parisien).

Извор запознаен со случајот наведува дека жената, родена во 1994 година, вчера вечерта го родила своето трето дете. Станувало збор за уште една бременост што ја криела, што наводно е нејзин трет таков случај. Нејзиниот сопруг не бил дома кога таа отишла во болница со болки во стомакот.

Бидејќи претходно се расправале за содржината на некои кутии во куќата, мажот решил да ги прегледа, а во нив пронашол тело во распаѓање.

Сопругот ја однел торбата со пронајденото тело во болница, а персоналот веднаш ги известил судските органи. Криминалната полиција од Авињон го презела случајот и го пребарала домот. Истражителите пронашле повеќе остатоци што личат на фетуси во куќата. Тие биле складирани во пластични кеси сместени во кутии.

Двојката има две деца на возраст од осум и дванаесет години. Мажот е вработен, а жената е домаќинка. Соседите и познаниците ги опишуваат како луѓе без никакви проблеми или претходни инциденти. Канцеларијата на државниот обвинител во Карпентрас сè уште не дала никакви изјави.

Жената сè уште е на болничко лекување и сè уште не е официјално уапсена.