Во недела започнува зимското сметање на времето - Часовниците се враќаат еден час наназад

Со последниот октомвриски викенд повторно доаѓа и промената на часовниците. Во недела, на 25 октомври, започнува зимското сметање на времето, па во 03:00 часот стрелките ќе се вратат на 02:00 часот. Оваа промена значи еден час повеќе за одмор и спиење, но и пократки попладневни периоди со дневна светлина.

Кога станува збор за следната година, според сегашниот календар, часовниците повторно ќе се поместат нанапред на 28 март 2027 година, со што ќе започне летното сметање на времето. Преминот кон зимско сметање, пак, е планиран за 31 октомври истата година.

Иако календарот предвидува продолжување на оваа практика и во наредните години, не е сигурно дека сезонското менување на часовникот ќе остане во сила до 2031 година. Доколку Европската Унија постигне договор за измена на актуелните правила, можно е оваа практика да биде прекината и пред тој рок.

Прашањето за укинување на двојното сметање на времето веќе подолго време е предмет на дискусија во европските институции. Европскиот парламент во 2019 година се изјасни во прилог на прекинување на сезонското поместување на часовниците, но иницијативата сè уште не е спроведена, бидејќи земјите-членки не се усогласиле околу тоа кое време треба да остане трајно.

Дотогаш, граѓаните ќе продолжат да ги следат досегашните правила за промена на времето. Летното сметање започнува во последниот викенд од март, кога часовниците се поместуваат еден час напред, а зимското започнува во последниот викенд од октомври, кога времето се враќа еден час наназад.

Со претстојната промена започнува периодот во кој деновите постепено ќе стануваат пократки, а ноќта ќе настапува порано. Иако дополнителниот час за спиење за многумина е добредојден, помалото количество дневна светлина во попладневните часови е еден од најзабележливите ефекти на зимското сметање на времето.