Директор на училиште и еден наставник повредени во пукање на југот на Франција

Директорот на училиштето и наставник во училиштето во гратчето Обањ во департманот Буш-ди-Рон на југот на Франција денеска добија прострелни рани во вооружен напад на осомничен 14-годишен ученик.

Тие се ранети пред училиштето „Жозеф Лаканал“ во Обањ откако еден ученик испукал истрели од пиштол со калибар девет милиметри и од пушка сачмарка, пренесува „Фигаро“.

Брзо потоа напаѓачот бил уапсен, а ранетите директор и наставник се хоспитализирани со прострелни рани.

„Пукаше четири или пет пати и брзо по нападот беше уапсен“, потврди локалната полиција.

На лице место излегле припадници на локалната полиција и противпожарната служба на Обањ, а француските министри за внатрешни работи и за национално образование, како и министерот делегат за стручно образование, обука и професионална пракса, денеска попладне ќе го посетат Обањ.

Пукањето се случи во момент кога ширум Франција се одржуваат протести на средношколците поради незадоволство од состојбата во образованието и условите за школување.

МИА