Ѓорѓиевски: Печатената грешка веќе е коригирана, а Скопје доби нов знак како што доликува.

Градоначалникот Орце Ѓорѓиевски се огласи на Фејсбук по повод печатената грешка на билбородот што беше поставен на влезот на Скопје. Тој во објавата напиша дека кој работи и греши и оти печатената грешка е веќе корегирана.

-Кој работи и греши, а ме радува кога најголемиот проблем во Скопје е печатена грешка. Тоа е така затоа што јас и мојот тим го слушаме гласот на граѓаните и ги решаваме нивните проблеми. Веќе нема заборавени маала и населби, работиме посветено и чесно во служба на граѓаните.

Според него, опозицијата очигледно нема ниедна сериозна тема па се занимава со ниски страсти.

-Ако нашиот најголем грев е печатена грешка, тогаш сме на одличен пат! Жално е што поминаа два градоначалнички мандати и никој не го промени знакот ,,Добредојде во Скопје", кој руиниран стоеше така со години. Печатената грешка веќе е коригирана, а Скопје доби нов знак како што доликува. И за да нема дилеми, корекцијата градот не го чини ништо и трошоците се на компанијата - изработувач која го постави преку ЈП „Улици и патишта“, напиша Ѓорѓиевски во објавата на Фејсбук.

Претходно опозициската СДСМ преку соопштение критикуваше дека со погрешнииот билборд на кој коњот Букефал бил претставен со пет нозе, се нагрдил градот. -Ова не е прв пат ВМРО да го унаказува главниот град. Познато е дека токму ВМРО, преку проектот „Скопје 2014“, го обезличи градот со стотици споменици, фасади од стиропор и лавови кои немаа никаква историска или естетска вредност. Сега, наместо вистинско уредување и инвестиции, добиваме уште една кампања со AI-генерирани слики. Наместо реални резултати, ВМРО-ОКГ и Орце постојано прават кампањи. Сè е кампања, а резултати нема. наведе СДСМ во соопштение