Јанц: И реваншот против Македонците ќе биде предизвик

Македонската ракометна репрезентација овој викенд во Копер ќе го одигра реванш натпреварот против Словенија во рамки на квалификациите за пласман на Европското првенство.

Иако Словенците претходно оваа недела триумфираа на дуелот во Скопје со 32-26, капитенот Блаж Јанц истакна дека неговите соиграчи ги очекува уште еден тежок натпревар против македонската репрезентација, в недела од 18:30 часот во салата „Бонифика“, која е целосно распродадена.

„И вториот натпревар против Македонците ќе биде исклучителен предизвик. Тие се големи конкуренти. Трибините во салата Бонифика ќе бидат исполнети, така што и од таа перспектива очекуваме исклучителен натпревар. Победата од средата во Скопје треба да ја потврдиме во Копер. Ќе го покажеме најдоброто за што сме способни. Верувам во нашата победа“, изјави вечерва словенечкиот капитен Јанц за локалните медиуми.

По три одиграни кола во групата 1, Словенија е лидер с максимални шест бодови, пред Литванија (4), Македонија (2) и Естонија без бодови.

Пласман на континенталниот турнир ќе обезбедат двете првопласирани репрезентации, како и четирите најдобро третопласирани селекции од осумте квалификациски групи.