Метеоролозите предвидуваат „невиден“ Ел Нињо, 2027 ќе биде најтоплата година досега

Метеоролошката служба на Велика Британија предупреди дека феноменот Ел Нињо, кој се развива над Тихиот Океан, веројатно ќе биде најсилниот во поновата историја. Моќниот природен климатски феномен предизвикува раст на глобалните температури и може да го зголеми ризикот од екстремни метеорлошки настани, објавува BBC Weather.
Со ефектите од климатските промени предизвикани од човекот, Метеоролошката служба на Велика Британија оценува дека 2027 година веројатно ќе биде најтоплата година досега.
– Мора да бидеме јасни: ова е невиден настан. Никогаш не сум видел толку силен сигнал за Ел Нињо во нашите прогнози, изјави професорот Адам Скеиф, раководител на долгорочното предвидување во Метеоролошката служба.
Ел Нињо е природен метеоролошки феномен што се јавува на секои две до седум години и трае околу една година.
Научниците обично прогласуваат Ел Нињо кога температурите на површината на морето во клучен дел од Тихиот Океан се за 0,5 степени или повеќе над повеќегодишниот просек.
Сепак, сегашните мерења покажуваат дека тие се повеќе од два степена над нормалата, а најновите прогнози од британската Метеоролошка служба сугерираат дека ова затоплување би можело да надмине три степени, додека Ел Нињо се приближува до својот врв.
Тоа би било без преседан во метеоролошките записи што датираат од 1950 година, и веројатно најсилно затоплување од 19 век досега, соопшти Метеоролошката служба.
Некои други климатски организации предвидуваат уште поекстремни вредности од оние што ги прогнозира Метеоролошката служба, можеби дури 4 степени Целзиусови над просекот.
– Доколку се случи тоа, не е невозможно да го имаме најсилниот Ел Нињо во последните 500, па дури и 1.000 години, вели Ник Хаусфадер, климатолог во американската истражувачка организација „Беркли Ерт“.
Д-р Ник Данстон, климатолог во британската Метеоролошка служба, смета дека ова би можело да доведе до зголемување на глобалните просечни температури.
– Многу е веројатно дека 2027 година ќе ја замени 2024 како најтоплата година досега, смета Данстон.
Порано овој месец, Организацијата за храна и земјоделство на ОН предупреди дека Ел Нињо може да загрози десетици милиони луѓе во земјите изложени на ризик, предизвикувајќи штети во земјоделството и несигурност во снабдувањето со храна.
МИА
Ново на Сител
-

Мицкоски во Брисел на средба со Герт Јан Копман, во фокус европската перспектива на Македонија и реформите
-

МВР со детали за нападот врз 26-годишната Сара: Насилникот доби кривична и мерки на претпазливост
-

Сашко Кедев влезе во Гинисовата книга на рекорди како највозрасен човек кој ги искачил сите 14 врвови над 8.000 метри
-

Претреси во Неготино, пронајдена дрога, приведени две лица
-

„Алта банка“ оди на продажба: Народната банка бара нов сопственик за 95 отсто од акциите
-

„Тешко е да се биде оптимист“ - Гутереш не гледа скор крај на војната во Украина
-

Искра Хаџи Василева денеска ја презема функцијата шефица на ОЈО ГОКК
-

„Разговори за иднината во 12:05“: Нема амнестија за корумпираните политичари, незаконскиот имот мора да се одземе
