Преглед на вестите од светот

Апелацискиот суд на Соединетите Американски држави пресуди дека повеќето од глобалните царини што ги воведе Доналд Трамп се незаконски.

-Воведувањето царини не е во надлежност на претседателот. Само конгресот има вакво овластување наведе судот.

Пресудата влијае на реципрочните тарифи наметнати на повеќето земји во светот, како и на тарифите врз Кина, Мексико и Канада. Пресудата нема да стапи на сила до 14 октомври за да ѝ се даде време на администрацијата да побара од Врховниот суд да го разгледа случајот.

Трамп вели дека тарифите биле дозволени според Законот за вонредни економски овластувања. Ја критикуваше одлуката и судот.

-Тие денес, како високо политизиран Апелациски суд, погрешно рекоа дека нашите царини треба да бидат укинати, но знаат дека Соединетите Американски Држави на крајот ќе победат. Ако овие царини некогаш бидат укинати, тоа би била целосна катастрофа за земјата. Тоа би нè направило економски слаби, а ние треба да бидеме силни, напиша  американскиот претседател на Трут соушл.

САД им ги укинаа визите на палестинскиот претседател Махмуд Абас и на околу 80 други палестински функционери, спречувајќи го нивното учество на Генералното собрание на ОН во септември. Стејт департментот ги обвини палестинските власти дека не го осудуваат екстремизмот и дека се залагаат за еднострано признавање на палестинска држава.

Палестинското претседателство ја повика американската администрација да ја повлече одлуката, нагласувајќи ја целосната посветеност на Палестина на меѓународното право и резолуциите на ОН. Овој потег доаѓа во време кога неколку сојузници на САД, како Франција, Велика Британија, Австралија и Канада, се подготвуваат да ја признаат Палестина како држава на состанокот.

Обединетите нации реагираа дека е важно сите земји и набљудувачи, вклучително и палестинците, да бидат претставени на претстојниот самит во Њујорк.

„Се надеваме дека ова прашање ќе биде решено“, изјави портпаролот на генералниот секретар на он, Стефан Дужариќ.

Поранешниот претседател на украинскиот парламент Андриј Парубиј денеска е убиен во близина на неговиот дом во градот Лавов, Западна Украина. Напаѓачот, облечен како курир, испукал повеќе куршуми во Парубиј, кој починал на лице место. Потоа, атентаторот побегнал од местото на настанот со електричен велосипед.

Во тек е голема полициска операција за пронаоѓање на напаѓачот. Украинскиот претседател Володимир Зеленски го нарече убиството „ужасно“ и вети темелна истрага за пронаоѓање на сторителот и мотивите.

54 годишниот Парубиј се здоби со популарност како дел од украинското движење Мајдан, кое се залагаше за поблиски врски со Европската Унија и го собори прорускиот поранешен претседател Виктор Јанукович во 2014 година.