Одбележана годишнината од раѓањето на претседателот Борис Трајковски

Со полагање цвеќе и пригодна програма пред споменикот „Македонија“, подигнат во чест на трагично загинатиот претседател Борис Трајковски, денеска беше одбележана 69 годишнината од неговото раѓање.

Цвеќе положија претставници на Советот на Oпштината, членови на семејството Трајковски, граѓани, политички партии и здруженија.

- И кога зборуваме за споменикот „Македонија“, тогаш вреди да се истакне дека се лажат сите оние кои мислат дека Струмица има само еден подигнат споменик во чест на нашиот претседател. Не, овој наш град има толку споменици, колку што има жители во Струмица и струмичко, затоа што секој од нас подигнал споменик-паметник за Борис Трајковски во своето срце. Така ние струмичани го покажуваме нашиот незаборав и беспрекорната почит кон сограѓанинот и кон вториот претседател на Република Македонија. За жал, прерано го загубивме за да тагуваме, и на овој начин да си спомнуваме за него и за неговите човечки и државнички вредности, истакна Ице Беличев, член на Советот на Општина Струмица.

Пред споменикот на Трајковски беа прочитани и наградените творби по распишаниот литерaтурен конкурс во организација на Библиотеката “Благој Јанков Мучето” од Струмица.

Вториот претседател на државата, Борис Трајковски, е роден на 25 јуни 1956 во селото Моноспитово. Тој е близнак со брат му Александар и е трето дете во семејството.