Одбележување на матурската и полуматурската прослава на штитениците од ЈУ Детски дом за деца без родители и родителска грижа

Заменик-министерот за социјална политика, демографија и млади Ѓоко Велковски, градоначалникот на Град Скопје, Орце Ѓорѓиевски и градоначалникот на Општина Центар, Горан Герасимовски, присуствуваше на одбележувањето на матурската и полуматурската прослава на штитениците од ЈУ Детски дом за деца без родители и родителска грижа „11 Октомври“.

По тој повод, беа испратени честитки и пораки за поддршка до четворицата матуранти и една полуматурантка, кои денес затвораат едно важно животно поглавје и започнуваат ново.

- Матурата претставува симбол на растење, вложен труд, надеж и нови почетоци. Денешниот ден е доказ дека со љубов, грижа и вистинска поддршка, секое дете може да ја изгради својата иднина, да сонува големо и да верува во себе - беше истакнато на настанот.

Во обраќањето беше нагласено дека секое дете заслужува да расте во средина исполнета со љубов, сигурност и поддршка, а посебна благодарност и почит им беше изразена на воспитувачите, негувателите и сите вработени кои низ годините биле потпора и второ семејство на децата.

На матурантите и полуматурантката им беше порачано да бидат горди на својот пат, на сите предизвици што ги надминале и на успесите што ги очекуваат во иднина.

Воедно беше потенцирано дека грижата за децата не завршува со еден настан или честитка, туку продолжува преку конкретна поддршка, посветеност и заедничка заложба за подобра иднина за секое дете.

На крајот од настанот, беа упатени искрени честитки по повод матурирањето и полуматурирањето, со желби за многу успех, среќа и исполнети соништа во животот. 

 МИА