Oсум тони марихуана недостигаат во фирма за одгледување медицински канабис во струмичко

Речиси осум тони сув цвет од медицински канабис недостигаат во фирма за одгледување медицински канабис во струмичко, утврдиле полициските службеници при извршена контрола.

Според информациите од Министерството за внатрешни работи, СВР Струмица поднело кривични пријави против правно лице од селото Борисово, општина Ново Село, како и против В.К. од Ново Село, со престој во Струмица, кој бил управител на фирмата.

При контролата, спроведена од полициски службеници и претставници на надлежната комисија при Министерството за здравство, биле проверени просториите во кои се складирал сувиот цвет од медицински канабис.

Инспекторите утврдиле дека недостигаат 7.813,49 килограми сув цвет од медицински канабис, за кои фирмата немала соодветна документација и покритие.

Дополнително, биле откриени неправилности во документацијата поврзана со ангажираниот кадар, како и недостиг на друга задолжителна документација.

Против правното лице и управителот се поднесени кривични пријави за дела предвидени во член 95-в од Законот за контрола на опојни дроги и психотропни супстанции.