Пензионерите на протест, бараат повисоки пензии и оставки во Владата

„Ако има за вас, да има и за нас“ порачаа пензионерите кои од сите градови денеска се собраа на протест пред Владата. Остануваат на истите барања – 3.500 денари линеарно покачување и 18 илјади денари минимална пензија. Побараа оставка од премиерот Ковачевски и министерката за труд Тренчевска.

„Ние сме многу хумани. Ние не сме себични како нив. Нивната себичност е што не сакаат да го слушнат нашето барање. Ние немаме оружје в раце, туку го имаме најголемото нешто – гласот. Нашиот глас одлучува кој ќе седи во овие фотелји позади нас. Да живее Република Македонија. Да живеат пензионерите“ – Верче Јанческа

Револтирани се оти функционерите кои земаат повисоки плати за 78% се правдаат дека во фондот нема доволно пари за да се исполнат барањата на пензионерите.

„Кога може да земаат функционерите, од градоначалник до претседател на државата, 78%, тоа е срамно за државата“ – Исмаил Лика

„Со ребалансот на буџетот ќе си ги качеле уште платите. А за нас, само 6%“ – Сузана Штоф

Побараа по скратена постапка да се донесе закон за повисоки пензии, по примерот на други закони кои експресно беа изгласани во Собранието.

„И ова европско знаменце што го користат за нивни потреби, за криминални работи, за донесување на закони, така и со ова европско знаменце нека го донесат законот за линеарно покачување на пензионерите“ анкета

Министерката за труд и социјала се сретна со претставници на координативното тело. Им рекла дека работната група редовно одржува состаноци и следната недела ќе излезат со конкретни предлози.

„Работната група работи на креирање на краткорочни и на долгорочни мерки за пензионерите. Повторно како и претходната година ќе бидат креирани антикризни-социјални мерки како краткорочно решение и се работи на измени на законот за пензиско осигурување со кое ќе се обезбеди повисока минимална пензија. Тоа е системско решение како и претходното со усвојување на новата методологијата за усогласување на пензиите, со која се обезбедува постојан раст на пензиите“.

Ако не им се исполнат барањата, пензионерите најавија радикализација на протестите и формирање нов сојуз бидејќи постоечкиот не им дава поддршка.

Од Пензионерскиот синдикат сметаат дека е потребно линеарно усогласување.

„Минималната пензија изнесува 34 отсто од просечната нето исплатена плата, а доколку биде 45 отсто таа би изнесувала 16 437 денари. Просечната пензија која во овој момент е помала од минималната плата предлагаме да биде 60 отсто од просечна нето исплатена плата, односно истата да изнесува 21 916 денари“, велат оттаму.