Пукал кон сопругата, се заканувал и тепал ќерка: Уапсен насилник во Кисела Вода

Полициски службеници од СВР Скопје лишиле од слобода 55-годишен скопјанец кој се сомничи за семејно насилство и употреба на огнено оружје во семејниот дом во населбата Кисела Вода.

Според информациите од полицијата, на 06.03.2026 во 00:40 часот на подрачјето на Кисела Вода бил уапсен Б.С. (55) од Скопје, поради сомнение дека со пиштол пукал кон неговата 48-годишна сопруга, им се заканувал на нивните три ќерки на возраст од 26, 24 и 18 години и физички ја нападнал 24-годишната ќерка.

Како што е пријавено, инцидентот започнал на 1 март годинава по претходна расправија во семејниот дом, кога осомничениот испукал еден куршум од пиштол, кој завршил во прозорецот. Потоа отишол кај двете помлади ќерки, на возраст од 24 и 18 години, им се заканувал и физички ја нападнал 24-годишната ќерка.

Насилното однесување, според пријавата, се повторило и на 5 март околу 22:30 часот, кога повторно со пиштол ѝ се заканувал на сопругата, но бил спречен од ќерките да го употреби оружјето.

Осомничениот е задржан во полициска станица, а по целосно документирање на случајот против него ќе биде поднесена соодветна кривична пријава.