Случај ОУ „Тодор Јанев“: Родителите три часа го блокираа влезот и излезот на Чашка

Со возила, родителите на учениците во „Тодор Јанев“ во Чашка утрово ги блокираа патните правци Велес-Извор-Прилеп. Три часа ниту се влегуваше, ниту се излегуваше од општината. Според нивните тврдења, надлежните немаат слух за незаконското отворање на албанска паралелка со пет деца. 

Бојкотот на наставата трае повеќе од два месеци. Во декември, при вонреден инспекциски надзор беше утврдено дека е формирана паралелка со 5 деца во прво одделение со албанска национална припадност, чија настава според Статутот на училиштето се одржува на македонски јазик. За да се одржува на албански, Статутот мора да биде променет. 

Во меѓувреме, денеска во Влада, министерот Шаќири, премиерот Џафери и градоначалникот на Чашка ќе седнат на иста маса и ќе се обидат да скројат решение на овој проблем.

Првиот човек на Чашка за Сител кажа дека ако му бидат вратени ингеренциите, ќе постапувал според законите, а тие налагале дека во ова училиште албанска паралелка не може да биде формирана. 

Ингеренциите на Стојановски врз училиштето беа одземени во јули, минатата година. Тој доаѓа од редовите на СДСМ, меѓутоа при донесување на одлуките во Советот, неговите сопартијци коалицираат со ВМРО-ДПМНЕ.

На локалните избори во 2021, албанските партии ги обединија своите сили, па настапија со заедничка советничка листа за Чашка. Моментално, Советот на општина Чашка има 11 советнции, четворица од СДСМ, четворица од коалицијата на ДУИ, АА и Алтернатива, и тројца од ВМРО-ДПМНЕ.

Од МОН не дадоа конкретен одговор за тоа што би се очекувало на денешниот состанок. Оттаму само потенцираа политиката да не се меша во образовниот процес.