Тројца загинати во украински напади со дронови во Белгородската област, гранатиран и автобус

Во украински напади извршени вчера со беспилотни летала врз пограничната Белгородска област на Русија бил погоден автобус, при што се убиени најмалку три, а се повредени 19 лица, соопшти руското Министерство за одбрана.

Автобусот бил погоден при гранатирање во градот Шебекино, во близина на границата со Украина. Осумнаесет од 19-те повредени патници биле пренесени во болница.

Истовремено во напад со дрон врз трговски објект во село во близина на границата загинале две лица. Уште едно лице го загубило животот во напад во близина на Белгород.

Москва ја обвинува Украина за систематски напади врз автобуси во повеќе руски области.

Според портпаролката на руското Министерство за надворешни работи, Марија Захарова, последните напади покажуваат дека Украина го таргетира рускиот јавен превоз со „манијакална доследност“, одмаздувајќи им се на собичните луѓе поради, како што наведе, се поголемите неуспеси на фронтот.

Во меѓувреме, руските власти во Доњецката област соопштија дека вчера пет лица биле повредени при, како што наведоа, „напад со дрон врз автобус“.

Русија ја обвини Украина и за нападот минатиот месец врз автобус со белоруски деца кои патувале на летен камп. Тогаш загина една жена, а шест деца беа повредени.