Владата ќе формира ресурсен центар кој ќе ги помага општините кои немаат капацитет да аплицираат за проекти

СДСМ и ДУИ ќе бидат виновни ако пред изборите не се изгласа Законот за локална самоуправа. Ресорниот министер го впери прстот кон опозицијата за законот кој предвидува новите градоначалници да можат да се разрешеат од функцијата преку референдум, ако граѓаните кои ги избрале не се задоволни од нивната  работа. Причината што нема консензус за законот е бројот на советници, кој се одредува според бројот на жители, согласно пописот во 2021та. На овој начин 14 општини ќе треба да добијат помалку советници.

Нема пример во светот каде бројот на нерезиденти се зема како параметар за советници, бидејќи тие се жители на друго место. Имаше промени во 17 општини, од кои во 14 бројот на советници се намали, а во останатите три се зголеми согласно бројките од пописот, изјави Златко Перински, министер за локална самоуправа.

Министерот Перински најави дека Владата ќе ги помага општините кои немаат стручен кадар или капацитет да подготват проекти и да аплицираат за средства за развој на општините. Ќе се формира Ресурсен центар, каде ќе бидат ангажирани експерти и секоја општина која има проблем, ќе може да побара помош. 

„За да се одговори на овој децениски предизвик со кој се соочуваат општините потребен е систематизиран пристап и поврзување на мерките и активностите. Концептот што оваа Влада го нуди се однесува токму на систематизирана и институционализирана подршка во функција на реформа на локалната самоуправа во форма на ресурсен центар за поддршка на општините, кој што ќе понуди изводливи и одржливи решенија за зајакнување на капацитеите на општините“, додаде Перински. 

Во следниот период владата ќе распише оглас преку кој ќе бидат ангажирани екперти. Тие пак, ќе се финансираат од општината после секој завршен проект.