Филипче им вети на специјализантите дека од јуни ќе добиваат плата

И докторите кои почнале со специјализација од март годинава ќе добиваат плата. Ова им го вети министерот за здравство, откако утринава се собраа пред министерството за здравство да ги соопштат проблемите. Лично Филипче ги слушаше што имаа да кажат.

-Ние стоиме на ставот за ист третман на сите специјализанти, изјави Елмедина Асани, специјализант.

Министерот веднаш им одговори дека во  јуни ќе добијат плата околу 26.000 денари исто како нивните колеги .

- Вие сте најкреативниот дел од нашето општество, вие мора да останете во оваа земја, вие сте иднината и на нашето здравство и на медицината, им порача Венко Филипче, министер за здравство.

На дел од 100-тината специјализанти пак ќе им биде понудено да вработување во здравствени установи каде недостига кадар од нивната специјалност.

-Не постои конкретен договор за вработување и не се прецизирани условите за вработување, изјави Александра Георгиева, специјализант.

-За нас останува нејасно како ќе се вработуваат приватни специјализанти во државни институции, изјави Марко Костовски, специјализант.

На ова Филипче им одговори дека ќе се менуваат условите за специјализациите. Ако бидат вработени здравствената установа ќе им ги покрие специјализацијата, а доколку се откажат нема да плаќаат пенали.