Голема полициска акција во Куманово: Се разбива криминална група осомничена за изнуда, лихварство и перење пари

Засилено присуство на полициски специјалци утрово е забележано на улиците во Куманово, каде што, според неофицијални информации, се спроведува голема полициска акција насочена кон разбивање организирана криминална група.

Акцијата ја спроведува Одделот за сузбивање на организиран криминал и корупција при Бирото за јавна безбедност, во координација со Јавното обвинителство за гонење на организиран криминал и корупција.

Според првичните неофицијални информации, станува збор за криминална група составена од лица познати на кумановската криминална сцена, кои подолг временски период наводно се занимавале со изнуда, лихварство и перење пари. Се сомнева дека групата користела насилство, закани и уцени за стекнување противправна имотна корист.

За организатор на групата, според неофицијалните информации, се сомничи лице познато под прекарот Штука.

Полициски претреси се вршат на повеќе локации поврзани со осомничените, а предмет на проверки се и нотарска канцеларија и менувачница, поради сомневања за нивна можна поврзаност со криминалните активности.

Неофицијално, при досегашните претреси се пронајдени парични средства, возила и документација кои би можеле да бидат значајни за истрагата.

Акцијата следува по подолготрајна оперативно-истражна работа на полицијата и Обвинителството. Засега нема официјални информации за бројот на осомничени и евентуално приведени лица.