Град Скопје: Фокус е враќање на достоинствениот изглед на централното градско подрачје

 Градот Скопје продолжува со интензивни активности насочени кон обновување на јавните површини и подобрување на урбаниот амбиент. Во фокусот е враќањето на достоинствениот изглед на централното градско подрачје, со посебен акцент на местата што со години беа занемарени и оставени без основно одржување, соопштија денеска од Град Скопје.

- Со засилен ангажман и координација на сите градски служби, започнати се интервенции со што се враќа функционалноста, безбедноста и убавината на просторот што секојдневно го користат илјадници граѓани и посетители, се додава во соопштението.

Според градоначалникот Орце Ѓорѓиевски, се враќа сјајот на Скопје.

- Деновиве интензивно се работи на сите страни низ градот. Го средуваме она што со години беше запоставено, а требаше да се одржува секојдневно, затоа што Скопје го заслужува најдоброто. На плоштадот „Македонија“ се заменуваат скршените и пропаднати плочки, фонтаните што подолго време беа оставени на забот на времето, повторно ги враќаме во функција, а пристапните патеки конечно ќе престанат да бидат предизвик и мачнина за граѓаните, наведува градоначалникот.

Скопје мора да биде достоинствен, уреден и убав град, нагласува Ѓорѓиевски, „токму таков како што го паметиме и каков што сакаме да го оставиме за идните генерации“.

- Го правиме тоа за нас, но и за сите гости, кои секојдневно доаѓаат да го запознаат нашиот главен град, додава Ѓорѓиевски. 

МИА