Дарко Костадиновски нов претседател на Уставен суд

Дарко Костадиновски е нов претседател на Уставен суд. По девет неуспешни избори, 50 годишниот доктор по правни науки го доби неопходниот минимум од шест гласови за да може да застане на чело на судот. Предлогот тој да раководи со Уставен пристигнал од судијката Јадранка Дабовиќ – Анастасовска откако по утринското гласање Осман Кадриу не успеал да седне на централната столица во овалната маса.

Костадиновски на функцијата претседател доаѓа по шест и пол години откако е избран за уставен судија. Речиси две децении работел во кабинетот на шефот на државата, кога во 2018-та е предложен за судија на Уставен. 

Мандатот на новоизбраниот претседател е предвидено да трае до јуни 2027 година. Сепак, Костадиновски функцијата ќе мора да ја напушти шест месеци порано, во јануари кога се навршуваат девет години од неговиот судиски мандат. 

Изборот на нов претседател во Уставен не беше ни малку лесен. Се гласаше четири дена, во трка беа тројца судии, ама никој не успеа да стигне до гласовите на своите колеги. Васиќ-Бозаџиева, Павловска-Данева и Кадриу бараа поддршка, но и по девет круга гласање не стигнаа до неопходниот миниум за избор.

Сагата и можната блокада на работата на Уставен ја прекина судијата Костадиновски кој во иднина ќе раководи со судот кој се грижи за уставноста и граѓанските права и слободи.