Обвинение за нападот на млади фудбалери

Обвинителството покрена обвинение против таткото кој на фудбалски натпревар претепа две 15 годишни деца од противничкиот тим ФК Брегалница против кој играл неговиот син, кој бил фудбалер во Шкупи. Бараат и продолжување на неговиот притвор. 

На децата им нанел телесни повреди, а кај публиката и јавноста предизвикал чувство на несигурност, загрозување и страв. Настанот се случил во 89-тата минута од натпреварот, која судијата поради прекршок (фаул) доделил втор жолт картон со што го исклучил од игра синот на обвинетиот, кој играл за „Шкупи“. Незадоволен од одлуката, најпрво синот се однесувал неспортски и со тупаници и со удар со нога се обидел да се пресмета со еден од фудбалерите на „Брегалница“.Тогаш на теренот влегол таткото и со тупаници и клоци започнал да ги удира двете деца, нанесувајќи им телесни повреди. На игралиштето влегле и други лица од публиката, кои спречиле натамошна ескалација на настанот, објаснуваат од Обвинителството.

Но ова не изолиран случај на неспортско однесување и на терен и на трибини каде е вклучено и насилство. Од први јануари до 25 август, МВР регистрирало 75 настани на насилство и недостојно однесување на спортските натпревари.

Вчера пак во полициската станица во Штип, жена пријавила дека нејзиниот 22 годишен син за време на одржување на турнир во мал фудбал на спортско игралиште во село Лозово, бил физички нападнат од 45 годишен маж со иницијали Г.Н. Полицијата го расчистува случајот.