Општата болница во Струмица добива нови доктори и здравствен персонал

Струмичката општа болница добива засилување од околу шеесет нови вработувања, со што конечно се преземаат конкретни чекори за надминување на еден од најголемите предизвици со кои установата се соочуваше со години,  недостигот на здравствен кадар.

Меѓу нововработените се и дваесет и шест доктори, од кои петнаесет се приватни специјализанти кои  преку владината програмата  за поддршка  се интегрираат во јавниот здравствен систем. Според директорот на болницата д-р Гоце

Христов, со новите вработувања се опфатени сите гранки од медицината, односно сите специјалности со кои располага установата. 

Новите вработувања ги опфаќаат и техничкиот и средномедицинскиот персонал, меѓу кои се медицински сестри и болничари,  кадар од кој во моментов постои најголема потреба. Ова засилување има за цел да ги зајакне капацитетите на болницата и да придонесе за подобрување на секојдневното работење и грижата за пациентите.

Проширувањето на човечките капацитети е резултат на иницијатива на менаџментот на болницата, која доби позитивен одговор од Владата. Како регионален здравствен центар, Струмичката болница опслужува околу 200.000 осигуреници од југоисточниот дел на државата.