Боледувањата ја осиромашиле германската економија за 200 милијарди евра

Трошоците за боледување стануваат сè поголем товар за германската економија. Минатата година, производствените загуби и исплатите на плати на вработените за боледување ги чинеле компаниите повеќе од 200 милијарди евра, соопшти германската Влада.

Секој вработен во просек бил отсутен од работа 20,8 дена, што е речиси четири дена повеќе од 2020 година. Вкупно се забележани 881,5 милиони денови боледување, а секој изгубен работен ден чинел просечно 152 евра.

Најчести причини за боледување биле проблеми со мускулно-скелетниот систем, заболувања на респираторните органи и психички нарушувања. Производствените загуби достигнале 134 милијарди евра, а трошоците за надоместок на плати изнесувале 72,3 милијарди евра, што е за 26 отсто повеќе отколку пред пет години.

Според анализата на здравственото осигурување „АОК“, најголема сума за боледувања земале вработените во здравството, социјалните служби, металната индустрија, јавната администрација како и во трговијата, а најниски во финансискиот сектор и угостителството.

Според Штефан Гент, директор на Германската федерација на трговци на мало, високата стапка на боледувања создава дополнителен товар за компаниите и ја намалува нивната конкурентност. Гент, како еден од проблемите го наведе добивањето потврди за боледување по телефон и предложи да се укине ваквиот начин на работа. 

МИА